ДУШАНБЕ, 23 сен — Sputnik. Иттиҳодияи иқтисодии АвруОсиё барои Қазоқистон як бозори хеле бузург аст, ки маҳсулоти кишвар дар он фурӯхта мешавад, гуфт вазири савдо ва ҳамгироии Қазоқистон Арман Шаккалиев.
Вай ҳамчунин дар суҳбат бо хабарнигорон имкони хурӯҷи Қазоқистон аз ИИАО-ро арзёбӣ кард.
"Мо аз ҳеҷ куҷо хориҷ намешавем. Мо як ҷузъи фазои муттаҳид ҳастем - бартариятҳои он маълум аст. Дар 10 соли охир гардиши тиҷоратии мо бо кишварҳои узви ИИАО афзоиш ёфт. Мо афзоиши назаррасро мушоҳида кардаем - дар соли ҷорӣ ҳудуди 20 миллиард долларро ташкил дод", - қайд кард вазири қазоқ.
Ба гуфтаи ин мақомдор, Иттиҳодияи иқтисодии АвруОсиё барои Қазоқистон як бозори хеле бкзкрг аст.
"Мо ҳамдигарро бо чанд роҳ мукаммал мекунем. Аз ин рӯ, масъалаи хуруҷ шудан матраҳ нест. Масъалаи дигар ин динамикаи мухталифи дастгирӣ аст: ҳар як кишвар саноат ва механизмҳои худро дорад. Аммо муҳимтар аз ҳама, мо ҳама иштирокчиёни иқтисоди ҷаҳонӣ ҳастем. Ҳадафи мо афзоиши иқтидор ва зарфияти содирот аст", - афзуд Шаккалиев.
Ёдовар мешавем, ки Иттиҳоди иқтисодии Авруосиё (ИИАО) - созмонест, ки дар он Русия нақши барҷаста дорад ва ин созмон Қазоқистон, Қирғизистон, Белорус, Арманистон ва Русияро муттаҳид месозад.