ДУШАНБЕ, 17 авг — Sputnik. Президенти Тоҷикистон Эмомалӣ Раҳмон ва раиси шаҳри Душанбе Рустами Эмомалӣ бо фаъолияти кишоварзони шаҳри Турсунзода шинос шуданд.
Дар ин бора, хадамоти матбуотии президенти Тоҷикистон гузориш медиҳад.
Гуфта мешавад, ки дар рафти боздид кишардор барои истифодаи мақсадноки заминҳои корам, ҷамъоварии беталафи ҳосил, таъмини талаботи бозорҳои пойтахти кишвар бо маводи ғизоии хушсифати ватанӣ ва тақвияти иқтидори содиротӣ дастуру супоришҳо додааст.
"Эмомалӣ Раҳмон зимни суҳбат бо роҳбарият ва кишоварзони шаҳр барои зиёд намудани истеҳсолот, паҳн намудани таҷрибаҳои пешқадами деҳқонони Турсунзода, афзун намудани қудрати содиротӣ ва захираи озуқаворӣ барои зимистон, пеш аз ҳама барои эҳтиёҷоти пойтахт, дастуру ҳидоятҳо дод", - омадааст дар хабарнома.
Ҳамин тавр, президент аз заминҳои шолӣ, ки баъд аз ҷамоварии ҳосили гандум дар кишти такрорӣ парвариш меёбад, дидан кардааст.
Тибқи гузориши манбаъ, дар шаҳри Турсунзода дар майдони 5200 гектар шолӣ кишт кардаанд, ки аз ин 4000 гектараш кишти такрорӣ мебошад, ҳосилнокии интизорӣ аз ҳар гектари он 65 сентнерӣ мебошад.
Дар маҷмӯъ кишоварзони шаҳр мақсад доранд, ки имсол зиёда аз 40 ҳазор тонна ҳосили хушсифати шолӣ ҷамоварӣ карда, дар баробари таъмини талаботи дохилӣ, ҳамзамон содироти онро ба хориҷи кишвар низ ба роҳ монанд.