ДУШАНБЕ, 4 авг — Sputnik. Тавре Хадамоти зиддинҳисории Тоҷикистон зимни нишасти матбуотӣ хабар дод, дар шаш моҳи соли равон ба бозори кишвар ба миқдори 176,9 ҳазор тонна гази моеъ ворид гаштааст.
Ба иттилои ин ниҳод, ин нишондиҳанда нисбат ба ҳамин давраи соли қаблӣ 18,5 ҳазор тонна кам мебошад.
Хадмот қайд кардааст, ки ба Тоҷикистон дар ҳоли ҳозир 15 субъекти хоҷагидори гази моеъ ворид мекунанд.
Ин ниҳоди давлати хабар додааст, ки гази моеъ ба Тоҷикистон асосан аз ду кишвар ворид мегардад. Русия дар ин фаҳерист дар ҷойи аввал қарор гирифтааст.
Ба иттилои Хадамот дар ин давра ба Тоҷикистон аз Русия ба миқдори 94,1 ҳазор тонна ё 53,2% ва аз Қазоқистон ба миқдори 82,9 тонна ё 46,8% гази моеъ ворид гаштааст.
Ин дар ҳолест, ки ба иттилои Хадамоти зиддинҳисории Тоҷикистон воридоти бензин ба Тоҷикистон дар шаш моҳи соли равон афзоиш ёфтааст.
Иттилои ин ниҳод дар ин давра 15 субъекти хоҷагидорӣ ба ҷумҳурӣ 241,4 ҳазор тонна бензин ба маблағи 180 млн. доллар бо нархи миёёнаи 746 доллар ворид кардаанд.
Ин нишондиҳанда нисбат ба ҳамин давраи соли гузашта 3,7 тонна зиёд будаааст.
Ҳамзамон воридоти сӯзишвории дизелдӣ низ ба Тоҷикистон афзоиш ёфтааст. Дар шаш моҳи соли равон ба Тоҷикистон 264,8 ҳазор тонна сӯзишвории дизелӣ ворид гардидааст, ки нисбат ба ҳамин давраи соли гузашта 31,4 ҳазор тонна зиёд будааст.
Хадамоти зиддинҳисорӣ дар гузориши ахири худ аз афзоиши воридоти маҳсулоти нафтӣ хабар дод. Ба иттилои ин ниҳод дар шаш моҳ ба ҷумҳурӣ 563,6 ҳазор тонна маҳсулоти нафтӣ ворид гардид, ки нисбат ба ҳамин давраи соли гузашта 38,5 ҳазор тонна зиёд будааст.
Ёдовар мешавем, ки моҳи июл дар нуқтаҳои фурӯши сӯзишворӣ қимати маводи сӯхт андаке поин рафта буд.