ДУШАНБЕ, 2 июл — Sputnik. Сироҷиддин Муҳриддин, вазири умури хориҷиии Тоҷикистон бо ҳамтои эронии худ, Аббос Ароқчӣ суҳбати телефонӣ анҷом додааст. Дар ин бора сафорати Эрон дар Тоҷикистон иттилоъ дод.
Манбаъ афзуд, вазирони ду кишвар зимни суҳбат робитаҳои дуҷониба ва таҳаввулоти минтақа пас аз ҳуҷуми Исроилу Амрико ба хоки Эрон баррасӣ кардаанд.
Зикр гардид, ки вазири тоҷик дигарбора ба ҳамтои эронияш ва кулли мардуми Эрон дар робита ба ҳодисаҳои ахири нохуш изҳори ҳамдардӣ кард ва бори дигар ҳамлаи низомии Исроил ва Амрико ба Эронро ғайриқонунӣ дониста ва маҳкум кардааст.
Муҳриддин изҳори боварӣ намудааст, ки "мардуми бузург ва хирадманди Эрон ин давраро низ бо иқтидор пушти сар хоҳад гузошт”.
Дар зимн, Аббос Ароқчӣ аз мавқеи Тоҷикистон дар маҳкум кардани ҳамлаҳои беасоси Исроил ва Амрико ба Эрон изҳори қадрдонӣ кардааст.
Ӯ мавзеъгирии муштараки бахши аъзами ҷомеаи байнулмилалӣ нисбат ба қонуншиканиҳои Исроилро зикр намуда, масъулияти Шӯрои Амнияти СММ, Агентии Байналмилалии Энергияи Атомӣ ва дигар ниҳодҳои дахлдори байналмилалиро барои ба ҷавобгарӣ кашидани Исроил таъкид намудааст.
Ёдовар мешавем, ки ин аввалин тамоси телефонии вазири умури хориҷии Тоҷикистон ва Эрон пас аз ҳамлаи Исроил ба Эрон аст.
Бояд гуфт, Тоҷикистон яке аз аввалин давлатҳое буд, ки ҳамлаи Исроилу Амрико ба хоки Эронро шадидан маҳкум кард.