ДУШАНБЕ, 27 июн — Sputnik. Эмомалӣ Раҳмон, роҳбари давлат дар доираи сафари худ ба ВМКБ дар ноҳияи Роштқалъа Нерӯгоҳи обии "Себзор" - ро ба истифода дод.
Дар ин бора дафтари матбуоти роҳбари давлат хабар дода, афзуд, ки иншооти мазкур аз 3 агрегат иборат буда, иқтидори истеҳсолии он 11 мегаваттро ташкил медиҳад.
Зикр гардид, ки нерӯгоҳи "Себзор" бо ҷалби сармояи хориҷӣ сохта шуда, технологияи насбшуда имкон медиҳад, ки дар як сол зиёда аз 77,6 млн кВт/соат неруи барқи аз ҷиҳати экологӣ тоза истеҳсол карда шавад.
Ин нерӯгоҳ имкони бо барқ таъмин кардани 220 ҳзаор аҳолии вилоятро дорад. Илова бар ин, барои содироти барқ ба дигар давлатҳо имконияти иловагӣ пайдо шудааст.
Бояд гуфт, санги асос барои бунёди Неругоҳи обии "Себзор" аз ҷониби Эмомалӣ Раҳмон соли 2015 гузошта шуд ва акнун бо гузашти 10 сол нерӯгоҳи мазкур мавриди баҳрабардорӣ қарор гирифт.
Манбаъ афзуд, ки мавриди истифода қарор гирифтани Неругоҳи обии Себзор имкон фароҳам овард, ки дар Бадахшон истеҳсоли неруи барқ 25 фоиз зиёд ва эътимоднокию сатҳи таъминоти барқ беҳтар шавад.
Дар вақти бунёди Неругоҳи обии Себзор то 600 нафар бо кор таъмин шуда, 97% корҳо дар Неругоҳи обии "Себзор" аз ҷониби коргарону мутахассисони ширкатҳои маҳаллӣ ба анҷом расонида шудааст.