ДУШАНБЕ, 19 июн — Sputnik. Зиёда аз 3600 шаҳрванди хориҷӣ дархост кардаанд, ки фарзандонашон барои дохил шудан ба мактабҳои русӣ имтиҳони забони русиро супоранд.
Аммо ҳамагӣ 7% онҳо аз имтиҳон бомуваффақият гузаштанд, гуфт раиси Рособрнадзор Анзор Музаев дар мусоҳиба бо ТАСС дар Форуми байналмилалии иқтисодии Санкт-Петербург.
Ӯ гуфт, Рособрнадзор ҳар моҳ натиҷаҳои санҷишро назорат мекунад.
"Аз 1 апрел то 25 май 3677 нафар шаҳрвандони хориҷӣ барои дохилшавӣ ба муассисаҳои таълимӣ ҳуҷҷат супурданд, ки аз ин шумора воқеан 509 нафар дар санҷиш иштирок намуданд. Тибқи маълумот, 55% кӯдак - тақрибан 270 нафар - имтиҳони тестиро бомуваффақият гузаштанд, вале 45% аз уҳда набаромаданд. Акнун кӯдаконе, ки имтиҳон супорида натавонистанд, ҳақ доранд, пас аз се моҳ аз нав имтиҳон супоранд", - гуфт ӯ.
Музаев тавзеҳ дод, ки агар шумораи умумии дархостҳои пешниҳодшударо ҳисоб кунанд, пас ҳарду талабот - пешниҳоди ҳуҷҷатҳо ва бомуваффақият супоридани имтиҳон - танҳо 7% иштирокчиён иҷро кардаанду халос.
Дар идома ӯ гуфт, кӯдаконе, ки аз имтиҳон гузаштанд, акнун метавонанд дар мактабҳои русӣ бидуни мушкил таҳсил кунанд.
Санҷиши донистани забони русӣ барои шаҳрвандони ноболиғи хориҷӣ, ки мехоҳанд таҳсилро дар мактабҳои русӣ идома диҳанд, аз 1 апрели соли 2025 ҷорӣ карда шуд.
Нагузаштани имтиҳон барои рад кардани дохилшавӣ ба мактабҳои русӣ асос мешавад.