ДУШАНБЕ, 3 апр – Sputnik. Эмомалӣ Раҳмон, раисиҷумҳури Тоҷикистон, бо судури як фармон вакилони нави палатаи болоии парлумони кишвар даъвати ҳафтумро таъйин кард.
Дар ин бора хадамоти матбуоти сарвари давлат хабар дод.
Дар матни фармон, ки дафтари матбуоти президенти Тоҷикистон нашр кард, гуфта мешавад, ки киҳо аъзои палата таъин карда шуданд:
собиқ котиби Шӯрои амнияти ҷумҳурӣ ва собиқ муовини аввали раиси
палатаи поёнии парлумон Маҳмадалӣ Ватанзода,
директори мактаби русӣ-тоҷикии ба номи К. Ушинскии шаҳри Кӯлоб Рухшона Восифҷонзода;
раиси ноҳияи Мурғоби ВМКБ Ҳусния Раҷабзода;
раиси Иттифоқи нависандагони Тоҷикистон Низом Қосим,
директори литсейи шаҳри Исфара, Шаҳло Нодирӣ;
мудири муассисаи томактабии рақами 2-и ноҳияи Лахш Гулнисо Абдураззоқзода,
Ҷаласаи аввали палатаи болоии парлумони Тоҷикистон даъвати нав рӯзи 11 апрел баргузор шуда, ҷаласа соати 10:00 ба вақти маҳаллӣ оғоз мешавад.
Бояд гуфт, палатаи болоии парлумон аз 33 вакил иборат аст, ки 25 нафари онҳо тариқи овоздиҳии пинҳонӣ интихоб мешаванд, боқимонда аз ҷониби президенти кишвар таъин карда мешаванд.
Ёдовар мешавем, рӯзи 4 декабр фармони Эмомалӣ Раҳмон дар бораи баргузории интихоботи даъвати нави аъзои Маҷлиси миллии Тоҷикистон, палатаи болоии парлумон тасвиб шуд.
Тибқи қонунгузории интихоботии кишвар, 22 нафар аз 63 вакили палатаи поёнии парлумони Тоҷикистон аз ҳавзаи ягонаи умумиҷумҳуриявӣ мувофиқи рӯйхати ҳизбӣ, ки дар анҷумани пешазинтихоботӣ тасдиқ шудааст, ба Маҷлиси намояндагони Маҷлси Олии ҶТ интихоб мешаванд. Ҳамзамон 41 вакили палатаи поёнии парлумон аз ҳавзаҳои интихоботии якмандатӣ интихоб мешаванд.
Мувофиқи меъёрҳои қонунгузории Тоҷикистон, 90 рӯз пеш аз баргузории интихобот ба парлумон сарвари давлат расман санаи дақиқи онро эълон карда, то 75 рӯз пеш аз интихобот ҳизбҳои сиёсӣ уҳдадоранд, анҷуманҳои пешазинтихоботии худро гузаронанд.