ДУШАНБЕ, 24 мар — Sputnik. Дар Тоҷикистон барои “Фонди тақсими фоида” аз фурӯши нерӯи барқ аз нерӯгоҳи Роғун ҳисоби махсус боз мешавад.
Маълум аст, ки суратҳисоб дар хазинаи марказии Вазорати молияи ҷумҳурӣ кушода шуда, маблағи он баъди қабул ва тасдиқи барномаи муштараки тақсими имтиёзҳо истифода мешавад.
Қобили зикр аст, ки мардуми Тоҷикистон низ бо хариди саҳмияҳо дар бунёди ин нерӯгоҳ садҳо миллион сомонӣ сармоягузорӣ кардаанд.
Дар ҷаласаи қаблии саҳҳомони ҶДММ НБО “Роғун”, ки таҳти раёсати нахуствазир Қоҳир Расулзода баргузор шуд, масъалаи равона кардани маблағ аз фурӯши нерӯи барқи тавлиди ин нерӯгоҳ ба Барномаи тақсими фоида аз фаъолият низ баррасӣ шуда буд.
Тавре аз Вазорати энергетикаи ҷумҳурӣ хабар доданд, дар рафти вохӯрӣ иштирокдорон ҳамчунин ба мавзӯи тақсими даромад аз фурӯши нерӯи барқи дохилӣ ва содиротӣ, ки дар Нерӯгоҳи барқи обии “Роғун” низ истеҳсол шудааст, дахл карданд.
Хотирнишон мекунем, ки сохтмони неругоҳи барқи обии Роғун ҳанӯз идома дорад. Дар ду соли охир аз буҷаи давлатӣ барои сохтмон беш аз 9 млрд сомонӣ ҷудо шудааст.
Илова бар ин, давлат сармоягузоронро ба сохтмон ҷалб мекунад. Дар ин бора бо 6 созмони байналмилалӣ созишномаҳо баста шудаанд.
Вазорати энергетикаи кишвар қайд кард, ки то имрӯз зиёда аз 50 дарсади корҳои сохтмонӣ дар нерӯгоҳи барқи обӣ анҷом дода шудаанд.