ДУШАНБЕ,12 мар – Sputnik. Президенти Тоҷикистон Эмомалӣ Раҳмон бо як сафари давлатӣ вориди Ҷумҳурии Қирғизистон шуд.
Дар фурудгоҳи байналмилалии Манас президенти Тоҷикистонро шахсан Содир Ҷабборов пешвоз гирифт.
Атрофи фурудгоҳ бо расми раисҷумҳурон ва парчамҳои ду давлати ҳамсоя оро дода шудааст.
Ҳамчунин ба истиқболи кишвардори Тоҷикистон дар фурудгоҳ қаравули фахрӣ аз ҳар ду тараф саф ороста буд.
Президентро духтарони миллипӯши қирғиз бо гулдаста пешвоз гирифтанд. Ҳунармандон бошанд бо либосҳои махсус порчаҳои мусиқии қирғизӣ ва тоҷикиро иҷро намуда, фарҳанги миллии худро нишон доданд.
Котиботи раисҷумҳури Қирғизистон иттилоъ дод, ки фардо, 13 март раҳбарони кишварҳо доираи васеи масъалаҳои мавриди таваҷҷуҳи тарафайн ва дурнамои тавсеаи минбаъдаи ҳамкориҳои дуҷонибаро баррасӣ мекунанд.
Ҳамчунин ба имзо расидани санадҳои дуҷониба низ дар нақша аст.