ДУШАНБЕ, 17 фев — Sputnik. Тими мунтахаби занонаи Эрон оид ба футбол имсол низ ғолиби мусобиқаи чемпионати Ассотсиатсияи футболи Осиёи Марказӣ (CAFA)-2025 шуд.
Ин чаҳорумин чемпионати CAFA, ки дар Душанбе доир мешавад, чаҳорумин бурд барои духтарони эронӣ буд.
Рақобатҳои даври панҷуми ва охирини мусобиқа миёни Тоҷикистону Эрон 16-уми феврал дар Қасри теннис доир гардида, бо ҳисоби 1:10 ба фоидаи меҳмонон анҷомид
Дар бозии дигар Узбекистону Қирғизистон рақобатро бо ҳисоби мусовии 4:4 хотима доданд.
Дар умум Эрон дар мусобиқа дурахши хоса дошт, зеро дар бозии аввалаш, 9:0 Узбекистонро шикаст дод, дар рақобати дуюм Қирғизистонро 10:0 ва ҳамчунин дар даври сеюм Туркманистонро 6:3 мағлуб кард.
Бар асоси натиҷагириҳои бозиҳо яккачини Эрон бо 12 имтиёз дар садри ҷадвал қарор гирифт ва соҳиби медали тило гардид.
Дар ҷойҳои дуюмуқ сеюм мисли соли қаблӣ Узбекистон бо 7 имтиёз ва Қирғизистон бо 5 имтиёз қарор гирифтанд. Туркманистон бошад бо 4 хол ба зинаи чаҳорум рафт.
Ба тими миллии Тоҷикистон тақдири соли қаблӣ такрор шуду бидуни ҳеҷ имтиёзе дар охир монданд. Имсол низ ивази сармураббӣ - омадани Баҳром Ёрматов ба ҷойи Мустафо Афшорӣ чизеро тағйир надод.
Ҳамчунин дар поёни натиҷагириҳо беҳтарин нишонзани мусобиқа Марал Торкамани эронӣ бо 10 гол дониста шуда, Малика Эминоваи туркман беҳтарин дарвозабони мусобиқа ва ҷоизаи "Fair Play"-ро Қирғизистон гирифт.