ДУШАНБЕ, 14 янв — Sputnik. Президенти Эрон Масъуди Пизишкиён рӯзи 14-уми январ бо сафари расмӣ ба Тоҷикистон меояд.
Ба иттилои мақомоти Тоҷикистон сафари президенти Эрон ба Тоҷикистон то 16-уми январидома хоҳад ёфт.
Дар ин сафар гурӯҳе аз соҳибкорони баландпояи эронӣ ва намояндагони бахши саноату маъдан ва кишоварзии Ҷумҳурии Исломӣ ба Тоҷикистон меоянд.
Ба иттилои мақомоти Тоҷикистон дар меҳмонхонаи Ҳаят Реҷенсӣ Форуми иқтисодӣ, тиҷоратӣ ва сайёҳии Тоҷикистону Эрон баргузор мегардад.
Ҳамзамон, дар доираи сафари ҳайти болозикр, соҳибкорони эронӣ аз корхонаҳои саноатии Тоҷикистон боздид менамоянд.
Бояд гуфт, ки ин нахустин сафари ӯ ба унвони раиси ҷумҳурӣ ба Душанбе буда, ду рӯз идома хоҳад кард ва дар ин муддат ӯро Эмомалӣ Раҳмон, раисиҷумҳури Тоҷикистон ба ҳузур мепазирад.
Ин дидор дуввумин мулоқоти раҳбарони Тоҷикистону Эрон пас аз савганди Пизишкиён хоҳад буд. Нахуст дар ҳошияи иҷлоси Маҷмаи Умумии СММ дар Ню-Йорк баргузор шуд.
Тарафҳо қасд доранд бастаи бузурги асноди бахшҳои иқтисоду тиҷорат ва фарҳангро имзо кунанд.
Интизор меравад, дар ин сафар Пажӯҳишгоҳи фарҳанги форсиву тоҷикӣ ифтитоҳ ва фаъолияти маркази “Саломат” – и Ҳилоли Аҳмар, ки дар гузашта мутаваққиф шуда буд, аз сар гирифта шавад.