Раҳмон ба роҳбари Гурӯҳи Бонки исломии рушд ордени "Дӯстӣ" дод

Ордени "Дӯстӣ"-ро ба роҳбари Гурӯҳи Бонки исломии рушд Муҳаммад ал-Ҷасир муовини якуми Сарвазири Тоҷикистон дар шаҳри Риёз шахсан супурд
Sputnik
ДУШАНБЕ, 25 ноя — Sputnik. Президенти Тоҷикистон Эмомалӣ Раҳмон барои саҳми арзанда дар рушди ҳамкориҳои дуҷониба ба роҳбари Гурӯҳи Бонки исломии рушд доктор Муҳаммад ал-Ҷасир ордени "Дӯстӣ" дод.
Дар ин бора дафтари матбуоти вазорати энергетика ва захираҳои оби Тоҷикистон хабар додааст.
“Ба хотири саҳми арзандаи роҳбари Гурӯҳи Бонки исломии рушд доктор Муҳаммад ал-Ҷасир дар рушди ҳамкориҳои дуҷониба аз номи Президенти Тоҷикистон мавсуф бо ҷоизаи давлатии Тоҷикистон – ордени "Дӯстӣ" қадр кардони шудааст”, - иттилоъ додааст манбаъ.
Қайд карда шудааст, ки Ордени “Дӯстӣ” дар пойтахти Арабистони Саудӣ – шаҳри Риёз зимни мулоқоти ҳайати Тоҷикистон зери роҳбарии муовини якуми Сарвазири кишвар Ҳоким Холиқзода бо роҳбари Гурӯҳи Бонки исломии рушд доктор Муҳаммад ал-Ҷасир супурда шудааст.
Раҳмон барои таваҷҷуҳи Бонки исломии рушд ба бунёди "Роғун" сипос гуфт.
Ҳамчунин ба иттилои манбаъ, дар вохӯрӣ масоили энергетикӣ, амнияти озуқаворӣ, нақлиёт, тандурустӣ ва маориф дар чаҳорчӯбаи Барномаи ҳамкории кишварҳо барои солҳои 2023-2026 мавриди баррасӣ қарор гирифтанд.
Зимни суҳбат қайд гардид, ки то имрӯз аз ҷониби Гурӯҳи Бонки исломии рушд барои дастгирии лоиҳаҳо дар соҳаҳои мухталиф 825 миллион доллар ҷудо шудааст.