ДУШАНБЕ, 24 окт — Sputnik. Дар Тоҷикистон ҳоло захира кардани маҳсулоти гуногуни ғизоӣ идома дорад.
Ба иттилои Оҷонсии омор, то аввали моҳи октябри соли равон дар Тоҷикистон 7 692 тон зироати ғалладонагӣ захира гардидааст.
Манбаъ афзуд, аз маҳсулоти ғалладонагии захирагардида 7 336 тоннаро гандум, 0,2 тон ҷавдор ва 360 тоннаро ҷав ташкил медиҳад.
Илова бар ин, барои 169 тон картошка ва 3 694 тон сабзавот, аз ҷумла 22 тон сабзӣ ва 3 671 тон бехпиёз захира гардидааст.
Оҷонсии омор зикр намуд, ки дар сардхонаҳои мамлакат инчунин мевагиҳо низ нигаҳдорӣ мешаванд. То аввали моҳи равон дар сардхонаҳо 168 тон мевагӣ, аз ҷумла 85 тон ангур захира шудааст.
Орд, ки яке аз маҳсулоти асосии ғизоӣ дар Тоҷикистон меравад низ ба қадри лозима захира шудааст. Оҷонсӣ гуфт, дар давраи зикргардида 1 626 тон орд ҷамъ оварда шудааст. Инчунин равған ба миқдори 485 тон шакар, 230 тон биринҷ захира гардидааст.
Маврид ба зикр аст, ки захира кардани маҳсулоти ғизоӣ на танҳо фоиданок, балки зарур ҳам мебошад. Зеро он ба таъмини амнияти озуқавории сокинон равона шудааст.
Зикр гардид, ки дар сурати кам гардидани маҳсулот бо ташкил кардани ярмарка-фурӯши маҳсулот камчинии маҳсулот аз байн бурда мешавад ва ҳамзамон нархи он низ танзим мешавад.
Бояд гуфт, Эмомалӣ Раҳмон қариб дар ҳар сафараш ба минтақаҳои Тоҷикистон зимни суҳбат бо сокинон дархост мекунад, ки ҳар як оила бояд барои ду сол маҳсулоти ғизоиро захира кунад.