ДУШАНБЕ, 16 окт — Sputnik. Дар тамрингоҳи Ҳарбмайдон дар Тоҷикистон бо фармондеҳии нерӯҳои дастаҷамъии зудамали минтақаи Осиёи Марказӣ ҷамъомади фаврии контингентҳои кишварҳои узви Созмони Паймони Амнияти Дастаҷамъӣ (СПАД) оғоз шуд.
Дар ин бора дафтари матбуоти Ситоди муштараки СПАД хабар додааст.
Мавзӯи ҷамъомад: "Асосҳои омодагӣ ва гузаронидани амалиёти ҷангӣ аз ҷониби Қувваҳои зудамали Дастаҷамъии Осиёи Марказӣ барои нест кардани гурӯҳҳои мусаллаҳи ғайриқонунӣ, ки ба қаламрави як кишвари узви СПАД ворид шудаанд".
Чорабинӣ аз 14 то 16 октябр баргузор мешавад.
Дар ин ҷо намояндагони вазоратҳои дифои Қазоқистон, Қирғизистон, Русия, Тоҷикистон ва гурӯҳе аз афсарони ситоди муштараки СПАД ширкат доранд.
Бахши аъзами контингенти Русияро низомиёни ҳавзаи марказии низомии пойгоҳи низомии 201 ташкил медиҳанд.
"Ҳадафҳои ин ҳамоиш таҳияи равишҳои ягона барои ташкили кори ҳайати оперативии мақомоти фармондеҳӣ ва назоратии Нерӯҳои зудамали дастаҷамъии Осиёи Марказӣ дар ҷараёни омодагӣ ба амалиёти ҷангӣ, такмили маҳорат ва муттаҳидсозии маҳорати онҳо мебошад", — гуфта мешавад дар изҳорот.
Дар ҷараёни машқҳо ҳамчунин ҳамоҳангсозии фармондеҳӣ ва ситоди КҲФ дар остонаи марҳилаи фаъоли машқҳои муштараки "Рубеж-2024", ки рӯзҳои 17-21 октябр баргузор мешавад, дар назар аст.