ДУШАНБЕ, 21 сен — Sputnik. Намояндагони Русия ва Тоҷикистон ҳамкориҳоро дар чаҳорчӯби корхонаи муштарак (КҶ) - НБО-и Сангтӯда-1 баррасӣ карданд.
Сергей Тсивилев, вазири энержии Русия бо ҳамтои тоҷикаш Далер Ҷумъа дидору гуфтугӯ кард, ки дар ҷараёни он тарафҳо кори неругоҳи барқи обии "Сангтӯда" ва омодагиҳо ба ҷаласаи комиссияи байниҳукуматии ҳамкориҳои иқтисодиро баррасӣ карданд, гузориш медиҳад Вазорати энергетикаи ФР.
"Тарафҳо ҳамкориҳои дуҷониба дар бахши энергетика, аз ҷумла: ... кори неругоҳи барқи обии "Сангтӯда", фаъолияти комиссияи байниҳукуматӣ оид ба ҳамкориҳои иқтисодии Русия ва Тоҷикистон, аз ҷумла омодагиҳо ба ҷаласаи навбатӣ, ки рӯзи 4 октябр дар Душанбе баргузор мешавад, мавриди баррасӣ қарор доданд”, - гуфта мешавад дар Telegram-канали вазорат.
Бар асоси ин гузориш, ҷонибҳо ҳамчунин ҳамкориҳои дуҷониба дар бахши энержӣ ва таҳияи стандартҳои соҳаро баррасӣ кардаанд.
Ба гуфтаи Тсивилев, таъсиси онҳо омили асосии рушди комплекси сӯзишворию энергетикии ду кишвар хоҳад буд.
Дар авоили моҳи август ҷонибҳо имкони содироти нерӯи барқ аз НБО "Сангтӯда-1" пас аз анҷоми ҳамгироии низоми энержии Тоҷикистон бо Системаи ягонаи энержии Осиёи Марказиро баррасӣ карданд.
Саҳми ширкатҳои русӣ дар сармояи оинномавии ҶСК НБО "Сангтӯда-1" 75% бо минуси як саҳмия, саҳми Тоҷикистон 25% ҷамъи як саҳмияро ташкил медиҳад.
Қаблан хабар дода шуда буд, ки барои бунёди неругоҳи барқи обии "Себзор" дар минтақаи Роштқалъаи Тоҷикистон маблағи грантӣ ҷудо шудааст. Байни ин идора ва ҶСК "Помир Энержи" шартномаи дахлдор баста шуд.