ДУШАНБЕ, 8 сен — Sputnik. Раисҷумҳури Русия Владимир Путин ҳамтои тоҷикаш Эмомалӣ Раҳмонро дар робита ба Рӯзи истиқлолияти Тоҷикистон табрик кард
Дар ин бора дафтари матбуоти президенти Тоҷикистон хабар додааст.
Ба иттилои манбаъ, дар ин паём раҳбари Русия табрикоти самимӣ расонида, гуфтааст, ки муносибатҳои миёни давлатҳои мо дар рӯҳияи шарикии стратегӣ ва ҳампаймонӣ пайгирона рушд карда истодаанд.
Ба гуфтаи Путин, Русия ва Тоҷикистон дар самтҳои мухталиф ва дар доираи ИДМ, СААД, СҲШ, СММ ва дигар сохторҳои бисёрҷониба ба таври фаъол ва самарабахш ҳамкорӣ доранд.
Вай бовар дорам, ки бо талошҳои муштарак мо тақвияти минбаъдаи тамоми маҷмӯи робитаҳои созандаи Русия ва Тоҷикистонро таъмин хоҳем кард.
"Ин, бешубҳа, ҷавобгӯи манфиатҳои аслии мардумони ба ҳам дӯсти мо буда, дар роҳи таҳкими амният ва субот дар Осиёи Марказӣ сурат мегирад",- таъкид кардааст Путин.
Дар поёни номааш ба Эмомалӣ Раҳмон сиҳатмандии бардавом ва комёбиҳо ва ба мардуми тоҷик сулҳу шукуфоӣ таманно кардааст.
Маврид ба зикр аст, ки табрикоти сарони кишварҳо ва созмонҳои байналмилалӣ ба унвони раисҷумҳури Тоҷикистон дар робита ба Ҷашни истиқлол идома дорад.
Имсол Ҷумҳурии Тоҷикистон 33 – солагии Истиқлоли давлатиро таҷлил мекунад, ки чорабиниҳои асосии он дар шаҳри Хуҷанд барпо карда мешавад.