ДУШАНБЕ, 31июл — Sputnik. Раиси Кумитаи ҳолатҳои фавқулодаи Тоҷикистон Рустам Назарзода, дар нишасти хабарӣ эълон кард, ки офатҳои табиӣ дар шаш моҳи аввали соли 2024 ба кишвар қариб 131 млн сомонӣ. ки муодили 12 млн доллар аст, зарар расондаанд.
Оқои Назарзода таъкид кард, ки дар нимсолаи аввали соли равон дар кишвар 532 офати табиӣ рух додааст, ки назар ба ҳамин давраи соли гузашта 57 маврид бештар аст.
“Дар 12 офати табиӣ 15 кас ҷон додаанд. 9 нафар дар натиҷаи омадани сел, 4 кас дар натиҷаи раъду барқ ва 2 нафар дар вақти фаромадани ярч”, - гуфт раиси Кумитаи ҳолатҳои фавқуллодам кишвар.
Ҳамчунин роҳбари КҲФ дар нишасти хабарӣ аз афзоиши ғарқ шудани сокинон изҳори нигаронӣ кард.
Рустам Назарзода гуфт, дар шаш моҳи имсол 86 кас дар дарё ва кӯлҳо ғарқ шуданд. Шумораи ғарқшудаҳо назар ба соли гузашта 2 нафар бештар мебошад.
Ёдовар мешавем, ки соли равон дар фасли баҳор дар Тоҷикистон омадани селҳои зиёд ба қайд гирифта шуда буд, ки дар натиҷаи он даҳҳо манзили сокинон ва иншооти гуногуни иҷтимоӣ осеб диданд.