ДУШАНБЕ, 20 июл — Sputnik. Масоили муаррифии ёдгориҳои таърихии вилояти Суғд ва шомилсозии онҳо ба Феҳристи ҷаҳонии ЮНЕСКО дар мулоқоти Раиси вилояти Суғд Раҷаббой Аҳмадзода бо ҳайати котиботи номинатсияи фаромиллии Роҳи абрешим: Долони Фарғона — Сирдарё бо роҳбарии Жанат Сеидалиева баррасӣ кард.
Дар ин бора дафтари матбуоти раиси вилояти Суғд хабар додааст.
Раиси вилоят дар ин дидор қайд кард, ки солҳои соҳибистиқлолӣ Тоҷикистон як қатор иншооти таърихиву фарҳангиро эёҳ намуда, онҳоро ба Феҳристи ҷаҳонии ЮНЕСКО ворид кард.
“Давоми солҳои 2019-2021 ҷиҳати шомилсозии шаш ёдгории таърихӣ, фарҳангӣ ва меъмории ҳудуди вилояти Суғд ба Феҳристи ҷаҳонии ЮНЕСКО корҳои назаррас анҷом дода шуда, ҳадафи ташрифи меҳмонон омӯзиши пурра ва дақиқи ин иншоот мебошад”, - қайд кардааст дафтари матбуоти раиси вилояти Суғд.
Қайд карда шудааст, ки мутахассисон аз Маҷмааи меъмории Шайх Муслиҳиддин, Қалъаи Ширини ноҳияи Спитамен, сангнигораҳои ноҳияи Ашт, Мақбараи Ҳазрати Шоҳи шаҳри Исфара, Қалъаи Қаҳ-қаҳаи ноҳияи Шаҳристон, мадрасаи Абдулатиф Султон (Нуҳ гумбаз)-и шаҳри Истаравшан боздид карда, дар иншооти фарҳангӣ корҳои омӯзишӣ мегузаронанд.
Изҳори боварӣ карда шуд, ки мутахассисон бо таърихи бойи рангину халқи тоҷик аз наздик шинос шуда, барои воридшавии иншооти нодиру ёдгориҳои қадима ба Феҳристи ҷаҳонии ЮНЕСКО мусоидат мекунанд.
Аҳмадзода қайд кард, ки айни замон дар вилояти Суғд зиёда аз 1190 ёдгории таърихӣ, фарҳангӣ ва меъморӣ ба қайд гирифта шудааст.