ДУШАНБЕ, 15 июл — Sputnik. Сафири Тоҷикистон дар Миср Парвиз Мирзозода Эътимодномаи худро ба Президенти Ҷумҳурии Арабии Миср Абдулфаттоҳ Ас-Сисӣ супорид.
Дар ин бора вазорати корҳои хориҷии Тоҷикистон хабар додааст.
Ба иттилои манбаъ, Парвиз Мирзозода салому паёмҳои Президенти Ҷумҳурии Тоҷикистон Эмомалӣ Раҳмонро ба раисҷумҳури Миср Абдулфаттоҳ Ас-Сисӣ расонд.
Сафири Тоҷикистон ҳамчунин бо вазири навтаъйини корҳои хориҷӣ, муҳоҷират ва умури мисриёни хориҷ аз кишвар Бадр Абдулъотӣ мулоқот намуд.
Ёдовар мешавем, ки 6 май бо қарори раисҷумҳури Тоҷикистон Эмомалӣ Раҳмон Парвиз Мирзозода ҳамчун сафири Тоҷикистон дар Миср таъин шуда буд.
Ӯ дар ин вазифа Заробиддин Қосимиро иваз кард.
Муносибатҳои дипломатӣ байни Тоҷикистон ва Миср 1 апрели соли 1993 барпо шудааст. Миср истиқлолияти Тоҷикистонро якуми январи соли 1992 ба расмият шинохт.