ДУШАНБЕ, 12 июл — Sputnik. Ба иттилои мақомоти вилояти Суғд, ҳаҷми умумии гардиши савдо дар 6 моҳи соли равон ба 9 млрд. 240 млн. сомонӣ расид.
Ба иттилои манбаъ, суръати афзоиш нисбат ба ҳамин давраи соли қаблӣ 107,5%-ро ташкил додааст.
Дар ҳамин ҳол, ҳаҷми гардиши савдои хориҷии вилояти Суғд ба иттилои мақомдорони вилоят дар моҳҳои январ-июни соли 2024 ба 1 млрд. 475 млн. доллар расонида шуда, суръати афзоиш нисбат ба ҳамин давраи соли гузашта 109,2% фоиз таъмин гардид.
Ҳаҷми воридот 1055,5 млн. долларро ташкил дода, нисбат ба ҳамин давраи соли қаблӣ 129,3 млн. доллар ё 14% фоиз афзудааст.
Содироти маҳсулот бошад аз вилоят дар ин давра 420,1 млн. долларро ташкил додааст.
Қайд карда шудааст, ки дар моҳҳои январ-марти соли равон ба иқтисодиёти вилоят ба маблағи 60 млн. доллар сармоягузории ватанию хориҷӣ ҷалб гардида, суръати афзоиш нисбат ба соли 2023-юм 110,6% таъмин гардидааст.
Аз ҷумла, ба маблағи 39 млн. доллар сармояи хориҷӣ ва ба маблағи 21 млн. доллар сармояи ватанӣ ба соҳаҳои гуногуни иқтисодиёти вилоят равона карда шудааст.