ДУШАНБЕ, 10 июл — Sputnik. Яке аз хатарҳои асосӣ аз нигоҳи устувории буҷет ва қарз ин маблағгузории нерӯгоҳи барқи обии Роғун мебошад.
Дар ин бора дар гузориши Хазинаи субот ва рушди Авруосиё гуфта мешавад.
Гуфта мешавад, ки эҳтимоли болоравии арзиши сохтмони нерӯгоҳи барқи обӣ метавонад боиси коҳиши маблағгузории дигар тарҳҳои дигари муҳим ва хароҷоти иҷтимоӣ шавад.
Таҳлилгарон таъкид мекунанд, ки "дар шароити номуайянии манобеъи маблағгузорӣ, дар соли 2025, ҳукумати Тоҷикистон ниёз ба кумаки изофии буҷет аз тарафи созмонҳои молии байналмилалӣ дорад”.
Аз ҳисоби фаъолтар шудани сохтмони нерӯгоҳи барқи обии "Роғун" ҳиссаи сармоягузориҳо ба бахши энержӣ, газ ва об аз 33,5% семоҳаи аввали соли 2023 то 42,4% дар семоҳаи аввали соли 2024 афзоиш ёфт.
Сохтмони нерӯгоҳи барқи обии Роғун, ки тарҳи техникии он дар замони шӯравӣ таҳия шуда буд, соли 2016 оғоз ёфт.
Моҳи ноябри соли 2018 агрегати якуми иншоот ба истифода дода шуд, агрегати дуюм моҳи сентябри соли 2019 ба кор даромад. Дар маҷмӯъ насби 6 чарха ба нақша гирифта шудааст, ки иқтидори лоиҳавии ҳар кадоми онҳо 600 МВт мебошад.