ДУШАНБЕ, 25 июн — Sputnik. Дар Тоҷикистон аз соли 2001 инҷониб маблағи лоиҳаҳо сармоягузорӣ дар бахши энергетика 2,7 млрд долларро ташкил додааст.
Дар маҷмӯъ 36 лоиҳа амалӣ шуда, дар 18 лоиҳаи дигар кор идома дорад, гуфт вазири энергетика ва захираҳои оби Тоҷикистон Далер Ҷумъа дар конфронси минтақавии "Дурнамои рушди манобеъи барқароршавандаи энержӣ дар Тоҷикистон".
"Аз соли 2001 то инҷониб 36 лоиҳаи сармоягузорӣ бо ҷалби 2,7 млрд доллар, ки ба истеҳсоли иқтидорҳои нави энергетикӣ, сохтмон ва таҷдиди дигар иншооти энергетикӣ равона шуда буд, амалӣ шудааст", - гуфт ӯ.
Айни замон татбиқи 18 лоиҳаи дигари сармоягузорӣ бо ҷалби маблағи 1,5 млрд. доллар идома дорад.
Вай ёдовар шуд, ки тибқи стратегияи миллии рушди Тоҷикистон то соли 2030 бояд иқтидори тавлиди нерӯи барқ дар кишвар то ба 10 ГВт ва ҳаҷми содироти нерӯи барқ то ба 10 млрд кВт/соат расонда шавад. Ҳамчунин талафоти нерӯи барқ то 10% кам карда шавад. Манбаи алтернативии энергия — офтоб, шамол ва ғайра.
Вай гуфт, ки дар Тоҷикистон 98% нерӯи барқ ҳамасола дар нерӯгоҳҳои барқи обӣ тавлид мешавад.
Далер Ҷумъа ҳамчунин таъкид кард, ки дар баробари ҷанбаҳои мусбати экологӣ ва молиявии ин нишондиҳанда вобастагии соҳа аз ҳаҷми об дар рӯдхонаҳои Тоҷикистон ва вазъи обу ҳаво дар шароити тағйирёбии иқлим афзоиш ёфтааст.
Дар конфронс дар мавзӯи "Дурномаи рушди манобеъи барқароршавандаи энержӣ дар Тоҷикистон" дар Душанбе намояндагони созмонҳои байналмилалӣ, коршиносон аз Узбекистон, Қазоқистон ва кишварҳои дигари минтақа иштирок доранд.
Онҳо вазъи энержӣ дар Осиёи Марказӣ, ташаббусҳои иқтисоди сабз, механизмҳои тиҷорати фаромарзӣ ва имконоти тавлид ва истифодаи манобеъи барқароршавандаи энержиро баррасӣ хоҳанд кард.