ДУШАНБЕ, 14 июн — Sputnik. Владимир Путин, раисиҷумҳури Русия, дар мулоқот бо раҳбарияти вазорати умури хориҷаи Русия гуфт, агар Киев ва Аврупо аз пешниҳоди нави сулҳи Русия даст кашанд, чуноне ки қаблан буд, шартҳои музокирот тағйир хоҳанд ёфт.
"Ғарб ва Киев роҳеро пеш гирифтанд, ки моро дар майдони ҷанг мағлуб кунанд, аммо, тавре шумо медонед, онҳо дар ин роҳ ноком шуданд. Мо боз як пешниҳоди воқеъии сулҳ пешниход мекунем, агар дар Киев ва пойтахтхои Ғарб мисли пешина онро рад кунанд, масъули идомаи хунрезӣ хоҳанд буд. Дар ин сурат шартҳои оғози музокирот гуногун хоҳад буд”, - гуфт Путин.
Путин афзуд, моҳияти пешниҳоди Русия дар он нест, ки низоъро ба монанди Ғарб мутавақиф созем, баракс ба он ниҳоят хотима диҳем.
"Ва ман бори дигар мегӯям, ҳамон лаҳзае, ки Киев ба ин пешниҳод розӣ шавад ва аз ҶМД ВА ҶМЛ, вилоятҳои Запорожие ва Херсон нерӯҳои худро хориҷ кунад ва ин корро ҳақиқӣ иҷро кунад, мо омодаем бидуни таъхир ба музокирот шуруъ намоед”, - таъкид кард ӯ.
Ин дар ҳолест, ки Дафтари Зеленский пешниҳодҳои Путинро дар бораи музокироти сулҳ рад кард ва гуфт, ки ин ташаббус гӯё маънои даст кашидани Киев аз ҳудуди худ мебошад.
Дафтари Зеленский изҳороти Путин дар бораи музокироти сулҳро як кӯшиши ба даст овардани ташаббус пеш аз нишасти Украина дар Швейтсария арзёбӣ кард.
Русия 24 феврали соли 2022 амалиёти низомиро дар Украина оғоз кард. Президент Владимир Путин ҳадафи онро "ҳимояи одамоне номид, ки дар тӯли ҳашт сол аз сӯи режими Киев мавриди таҳқиру наслкушӣ қарор гирифтаанд”.
Ба гуфтаи ӯ, барои ноил шудан ба ин ҳадаф "ғайринизомисозӣ ва нозизудоии Украина" ва ба ҷавобгарӣ кашидани тамоми ҷинояткорони ҷангии масъули "ҷиноятҳои хунини зидди мардуми осоишта" дар Донбасс пешбинӣ шудааст. Дар посух кишварҳои ғарбӣ алайҳи Русия таҳримҳои густурда ҷорӣ карданд.