ДУШАНБЕ, 12 июн — Sputnik. Тоҷикистон ният дорад дар Озарбойҷон "Боғи дӯстии зардолу" бунёд намояд.
Ин масъала ахиран зимни вохӯрии Вазири кишоварзии Тоҷикистон Қурбон Ҳакимзода бо Вазири кишоварзии Озарбойҷон Маҷнун Мамедов, ки ба Душанбе барои иштирок дар Конфронси сеюми байналмилалӣ оид ба Даҳсолаи байналмилалии амал "Об барои рушди устувор, солҳои 2018-2028" ҳузур дорад, баррасӣ шуд.
Дар ҷараёни вохӯрӣ ҳамчунин ҷонибҳо дар бораи омӯзиши таҷрибаи Озарбойҷон дар самтҳои рақамикунонӣ, Азеркосмос, навъсанҷии зироати кишоварзӣ, ба монанди тухмиҳои зироати ғалладонагии ба хушкӣ тобовар, ангурпарварӣ, чорводорӣ, омода намудани кадрҳои соҳаи кишоварзӣ ва табодули таҷриба байни кишоварзони ду кишвар табодули афкор намуданд.
Зимни мулоқот таъкид шудааст, ки ҳамкориҳои Тоҷикистону Озарбойҷон дар соҳаи кишоварзӣ дар сатҳи муносиб қарор дорад.
Ҷонибҳо барои боз ҳам тақвият додани ҳамкории минбаъда, изҳори омодагӣ намуданд.
Ҷонибҳо ба мувофиқа расиданд, ки барои афзоиши иқтидори содиротии давлатҳо дар самти кишоварзӣ аз тамоми имконияту роҳҳо истифода намуда, барои ташаккули ҳамкории минбаъда талош хоҳанд кард.