ДУШАНБЕ, 27 май — Sputnik. Раисони ҷумҳури Тоҷикистон Эмомалӣ Раҳмон ва Содир Ҷабборов ба ҳамдигар барқияи табрикӣ ирсол карданд.
Паёмҳо ба муносибати 20-солагии имзои Шартномаи байни ду ҷумҳурӣ дар бораи муносибатҳои неки ҳамсоягӣ ва шарикӣ ироа шуд.
Дар ин бора дафтари матбуоти раҳбари Тоҷикистон хабар додааст.
"Ман ҳавасмандии ҷониби Тоҷикистонро ба идомаи муколамаи байнидавлатии ду кишвар ва талошҳои муштарак барои рушди пайвастаи равобити гуногунҷанбаи ҷонибҳо таъкид мекунам", — гуфта мешавад дар матни барқияи Раҳмон.
Раҳбари Тоҷикистон ҳамчунин қайд кард, ки иҷрои бандҳои созишнома ба рушди равобити давлатҳо мусоидат мекунад. Дар баробари ин ба халқи қирғиз сулҳу амонӣ орзу намуд.
Дар навбати худ Содир Ҷабборов қайд кард, ки "таҳкими муносибатҳои неки ҳамсоягӣ дар заминаи эҳтироми ҳамдигар, эътимод, ризоият ва баробарҳуқуқӣ заминаи зарурӣ барои рушди минбаъдаи ҳамкории бисёрҷанбаи дуҷониба мебошад".
Вай инчунин таъкид кард, ки ин "ҷавобгӯи манфиатҳои умумии мардумони мо мебошад".
Созишномаи муносибатҳои неки ҳамсоягӣ ва шарикӣ миёни Тоҷикистону Қирғизистон 26 майи соли 2004 дар Душанбе ба имзо расида буд. Сипас кишварҳо ба мувофиқа расиданд, ки ба рушди ҳамкориҳо мусоидат кунанд.