ДУШАНБЕ, 21 май – Sputnik. Давоми як ҳафтаи охир беш 300 тон зардолуи пешпазак аз ноҳияи Ашт ба кишварҳои Русия ва Қазоқистон содир шудааст.
Соли ҷорӣ ҳосили зардолу фаровон буда, боғдорон азм доранд, ки таъминоти бозорҳои дохилӣ ва ҳам содирот ба кишварҳои хориҷӣ бо чунин навъ тармеваи пешпазакро бештар кунанд, гуфт сардори Раёсати кишоварзии ноҳияи Ашт, Бахтиёр Усмонов ба Sputnik Тоҷикистон.
"Дар маркази ноҳияи Ашт, равзанаи ягонаи амалиёти содиротӣ ва барасмиятдарории гумрукии маҳсулоти содиршаванда ташкил карда шудааст. Ин тасмим ба афзоиши суръати содироти тармева имконият фароҳам мекунад", - гуфт Усмонов.
Ноҳияи Ашт, яке аз калонтарин ноҳияҳои зардолупарвари шимоли Тоҷикистон маҳсуб мешавад, ки мавсими ғунучини тармева аз ҳама барвақт оғоз мешавад.
Бино ба иттилои сардори Раёсати кишоварзӣ, зимнан дар ноҳияи Ашт 20 ҳазор га зардолузор мавҷуд буда, аз он беш аз 12 ҳазор га боғҳои ҳосилдиҳанда мебошад.
Соли 2023 аз ин ноҳия 3, 8 ҳазор тон зардолу ба хориҷи кишвар умдатан ба Русия, Белорусия ва Қазоқистон содир карда шудааст.
Бино ба мушоҳидаи хабарнигори Sputnik Тоҷикистон ҳоло як кило зардолуи тар дар бозорҳои вилояти Суғд вобаста ба навъ ва сифат 6 – 8 то 10 сомонӣ фурухта мешавад.
Зимнан ҷамъи боғҳои ҳосилдиҳандаи зардолу дар навоҳии Суғд ба беш аз 30 ҳазор га баробар шудааст.
Зардолуҳои Суғд борҳо дар озмунҳои байнулмиллалии молу маҳсулоти беҳтарини кишоварзӣ мақомҳои баланд гирифтаанд ва аз ин лиҳоз талабот ба он дар хориҷи кишвар бештар аст.