ДУШАНБЕ, 18 май — Sputnik. Вай дар гузашта мушовири давлатии раисҷумҳури Тоҷикистон дар умури ҳуқуқ ва сиёсати байнулмилалӣ низ буд.
Шокирҷон Ҳакимов, муовини райиси Ҳизби сотсиал-демократи Тоҷикистон, дар таъйиди ин хабар ба Sputnik Тоҷикистон гуфт, мавсуф қарибиҳои зуҳр дар манзилаш, воқеъ дар маҳаллаи Маяковскийи шаҳри Душанбе аз олам чашм пӯшид.
“Раҳматуллоҳ Зойиров як шахси мутааҳиду вафодор ба ақида ва муътақид ба фардои дурахшони Тоҷикистон буданд. Он кас як муддати тӯлонӣ шадидан аз маризӣ ранҷ мебурданд ва дар бистари беморӣ қарор доштанд”, - гуфт Шокирҷон Ҳакимов.
Раҳматуллоҳ Зойиров 16 марти 1957 дар шаҳраки Боғистони вилояти Тошканди ҷумҳурии Ӯзбекистон ба дунё омада, хатмкардаи Донишгоҳи ҳуқуқи шаҳри Харков (1983), Академияи ҳуқуқи шаҳри Киеви Украина (1986) ва Донишгоҳи марксим-ленинизми назди Ҳизби коммунистии Иттиҳоди Шӯравӣ дар шаҳри Хабаровски Русия (1988) аст.
Вай як муддат дар Русия кор карда, соли 1988 ба Тоҷикистон омад. Дар донишгоҳҳо дарс мегуфт ва мудири шӯъбаи ҳуқуқи Академияи улум буд. Соли 1998 ҳизби “Адолат ва тараққиёт” – ро поягузорӣ намуд, ки баъдтар ба Ҳизби сотсиал-демократи Тоҷикистон табдили ном кард.
Солҳои 2001—2003 Раҳматулло Зойиров мушовири давлатии раисҷумҳури Тоҷикистон дар умури ҳуқуқ ва сиёсати байнулмилалӣ буд. Соли 2002 бо фармони президенти Тоҷикистон унвони мушовири давлатии адлияи дараҷаи дуюм ва рутбаи генерал-лейтенанти адлияро гирифт.
Раҳматулло Зойиров олими маъруфи ҳуқуқшинос, номзади илмҳои ҳуқуқшиносӣ ва муаллифи беш аз 270 кори илмӣ, 30 китоб дар улуми ҳуқуқ, ҳуқуқи ҷиноӣ ва байнулмилалӣ, сиёсатшиносӣ, иқтисод ва таърихи Тоҷикистон буд.
Ҷанозаи марҳум дар масҷиди маҳаллаи Маяковскийи шаҳри Душанбе баргузор мешавад. Бино ба гуфтаи Шокирҷон Ҳакимов, қарор аст дар қабристони маҳаллаи Сариосиёи шаҳри Душанбе ба хок супурда шавад.