ДУШАНБЕ, 25 мар — Sputnik. Ба сафорати Русия дар Душанбе афроди расмӣ меоянд, то изҳори таслият баён созанд.
Дар робита ба қурбониёни ҳамлаи террористии сершумори маҷмааи консертии Крокус Сити Холл дар сафорати Русия дар Тоҷикистон китоби таслият ифтитоҳ шуд.
Инчунин, суханони ҳамдардӣ метавонанд ба намояндагӣ тавассути почтаи электронӣ ирсол карда шаванд.
Сафирони Қазоқистон, Эрон, Беларус, Афғонистон ва ҳайати вакилони Кумитаи сарбозони интернатсионалист дар китоби таъзия навиштачот гузоштанд.
"Мо ин ҷинояти ваҳшиёнаро қотеъона маҳкум мекунем ва ҳамроҳ бо мардуми Русия мотам дорем",- навиштааст сафири Эрон Алиризо Ҳакиқиён.
Сафири Қазоқистон дар Душанбе Валихон Туреханов "ин куштори ваҳшиёнаи мардуми бегуноҳро, ки ҳеҷ гуна сафед кардан мумкин нест" шадидан маҳкум карда, ба тамоми хешовандон ва наздикони қурбониён изҳори ҳамдардии самимӣ кард.
"Аз номи сафорати Қазоқистон дар Тоҷикистон ва шахсан аз номи худам дар робита ба ҳамлаи даҳшатноки террористӣ, ки дар толори консертии Крокус Сити Холл рух дод, таслияти самимии худро баён мекунам",- навиштааст Турахонов.
Ёдовар мешавем, ки рӯзи 22 март дар толори консертии Крокус Сити Холл, воқеъ дар шимолу ғарби Маскав тирпарронӣ сурат гирифт.
Ҳамлагарон дар баробари парронидани бошандагони бино аз норинҷакҳои оташзо низ истифода карданд, ки боиси сӯхтори шадид шуд, ки барои хомӯҳ кардани он чархболҳо ҷалб шуданд.
Амалиёти наҷот дар маҳалли ҳамлаи террористӣ дар Крокус ба анҷом расида, ҷустуҷӯҳо бошад, идома дорад.
Тибқи маълумоти ахири Кумитаи тафтишоти Федератсияи Русия, шумори кушташудагон ба 137 нафар расидааст, ки се нафари онҳо кӯдакон мебошанд. 180 нафари дигар маҷрӯҳ шуданд.
Дар натиҷаи амалиёти вижа 11 муттаҳам, аз ҷумла 4 нафари онҳо боздошт шуданд.
Додгоҳи Басмании Маскав чаҳор муттаҳамро дар робита ба ҳамлаи террористӣ дар Крокус Сити Холл боздошт кард. Ҳамаи онҳо шаҳрвандони Тоҷикистон гуфта мешавад, ки ба ҳабси пешакӣ барои ду моҳ равон шудаанд.