ДУШАНБЕ, 15 мар — Sputnik. Раиси вилояти Суғд Раҷаббой Аҳмадзода зимни мулоқот бо Сафири Русия дар Тоҷикистон Семён Григорев ва Консули генералии Русия дар шаҳри Хуҷанд Сергей Ланкин сатҳи ҳамкории тиҷоратию иқтисодиро баррасӣ кард.
Дар ин бора дафтари матбуоти ҳукумати вилояти Суғд хабор додааст.
Ҳамчунин зимни суҳбат ҷонибҳо сатҳи кунунии муносибатҳои дӯстонаи ду кишварро баррасӣ намуда аз сатҳи ҳамкорӣ изҳори қаноатмандӣ намуданд.
Раҷаббой Аҳмадзода иброз дошт, ки вилояти Суғд бо минтақаҳои гуногуни Русия ҳамкории тиҷоратию иқтисодӣ дошта, бо сармояи муштарак як қатор корхонаҳои саноатӣ дар вилоят фаъолият доранд.
Зимни мулоқот оқои Аҳмадзода қайд кард, ки вилояти Суғд омода аст ҳамкорӣ дар бахшҳои саноату кишоварзӣ, дорусозӣ, сайёҳӣ, фарҳанг, илму маорифро боз ҳам тақвият бахшад.
Дар ҳамин ҳол, сафири Русия дар Тоҷикистон Семён Григорев низ дар навбати худ барои таҳкими равобити дӯстона изҳори омодагӣ кард.
Вай илова кард, ки дар густариши ҳамкорӣ консули генералии Русия дар шаҳри Хуҷанд Сергей Ланкин, ки нав ба ин вазифа таъин шудааст, хизмат хоҳад кард.