ДУШАНБЕ, 1 мар — Sputnik. Зарулло Раҳмонов бо сабаби ба нафақа баромадан аз вазифаи директори Институти математикаи ба номи А.Ҷӯраеви Академияи миллии илмҳои Тоҷикистон озод гардид.
Бо қарори ҳукумат ба вазифаи директори Институти мазкур, Алишер Раҳимзода таъйин шуд.
Гулчеҳра Қоҳирова низ бо сабаби ба нафақа баромадан аз вазифаи директори Институти астрофизикаи Академияи миллии илмҳои Тоҷикистон озод гардида, ба ҷояш Анвар Бӯризода омад.
Нозим Маҳмадизода директори Институти фалсафа, сиёсатшиносӣ ва ҳуқуқи ба номи А.Баҳоваддинови Академия таъйин шуд.
Ёрмаҳмад Ниёзӣ низ аз вазифаи директори Институти омӯзиши масъалаҳои давлатҳои Осиё ва Аврупо канор рафта, ба ҷояш Рустам Ҳайдарзода омад.
Инчунин Афзалшоҳ Зарифзода, директори Институти физикаву техникаи ба номи С.У.Умаров ва Дилшод Қадамзода директори Институти зоология ва паразитологияи ба номи Е.Н.Павловскийи Академияи миллии илмҳои Тоҷикистон таъйин шуданд.
Инчунин бо қарори ҳукумат Илҳом Амонзода дар вазифаи ректори Муассисаи давлатии таълимии "Донишгоҳи технологии Тоҷикистон" озод гардид.
Чанд ҳафта қабл ба мақоми президенти Академияи миллии илмҳои Тоҷикистон, Қобилҷон Хушвахтзода таъйин гардид, ки то расидан ба ин мақом ректор Донишгоҳи миллии кишвар буд.