ДУШАНБЕ, 10 фев — Sputnik. Соҳибкорони рус қасд доранд ба саноати нассоҷии Тоҷикистон сармоягузорӣ кунанд.
Ҳамин тавр, калонтарин комбинати саноати сабуки Русия лоиҳаро ба амалӣ мегардонад.
Истеҳсолоти "БТК-груп" ба технологияҳои пешрафта ва тамоюлҳои муосир асос ёфтааст.
Раиси шаҳри Кӯлоб Назарзода Бахтиёр зимни нишасти хабарӣ гуфт, мақомоти Тоҷикистон аллакай ба ин ширкат қитъаи замин ҷудо кардаанд.
Ба гуфтаи ӯ, ҳудуди 1,8 ҳазор гектар ба муддати 20 сол дода шудааст.
Барои оғози кор ҶДММ "Пахтаи Кӯлоб" аллакай дар мақомоти дахлдор, аз ҷумла дар мақомоти андоз сабти ном шудааст.
Корхона аллакай ба шаҳр 20 воҳиди таҷҳизот овардааст ва дар ояндаи наздик ба кор шуруъ карданист.
Тибқи созишнома дар минтақаи озоди иқтисодии Кӯлоб маҷмӯи корхонаҳои бофандагӣ ва ресандагӣ сохта мешавад.
Баъди ба кор даромадани он то 6 ҳазор нафар сокинони маҳаллӣ соҳиби ҷойи кор хоҳанд шуд.
Ба иттилои ӯ, дар маҷмуъ соли гузашта дар Кӯлоб истеҳсоли маҳсулоти саноатӣ ба 387 млн сомонӣ расонда шуда, дар шаҳр 29 корхонаи хурду миёна бунёд гардида, фаъолият мекунанд.
Қаблан хабар дода шуда буд, ки Русия ба Тоҷикистон дар бунёди паркҳои технологӣ кумак мекунад.
Ба гуфтаи вазири саноат ва технологияҳои нави ҷумҳурӣ Шералӣ Кабир, ҳамкориҳои саноатӣ бо корхонаҳои Русия дар самти афзалиятноки ҷумҳурӣ мебошад.