ДУШАНБЕ, 28 янв — Sputnik. Раисҷумҳури Тоҷикистон, Эмомалӣ Раҳмон бори дигар зарурати доштани захираи дусолаи ғизо барои ҳар оилаи кишварро таъкид кард.
Вай дар паёми ҷадидаш ба мардум таъкид намуд, ки афзоиши талабот ба озуқаворӣ ба яке аз масъалаҳои мубрами рӯз табдил ёфтааст.
"Солҳои охир доим таъкид месозам, ки ҳар як оилаи мамлакат бояд ба муҳлати то ду сол захираи маводи зарурии ғизоӣ дошта бошад", - гуфт Раҳмон.
Ба иддаои президенти Тоҷикистон ин пешниҳодаш бар пояи таҳлилҳои амиқ ироа гардидаст.
"Ин пешниҳод тасодуфӣ набуда, аз таҳлили амиқи вазъи пешгӯйинашавандаи ҷаҳони имрӯза, гусаста шудани занҷираҳои пешини таҳвили молу маҳсулот ва пайваста боло рафтани нархи маҳсулоти озуқаворӣ бармеояд", - тавзеҳ дод ӯ.
Вай инчунин хотирнишон намуд, ки бар асари тағйирёбии иқлим, гармшавии ҳарорати замин, инчунин, рӯз ба рӯз шиддат гирифтани вазъи иҷтимоиву иқтисодии ҷаҳони имрӯза, торафт зиёд шудани аҳолии сайёра ва афзоиши талабот ба озуқаворӣ ба яке аз масъалаҳои мубрами рӯз табдил ёфтаанд.
Дар ҳамоин шароит Эмомалӣ Раҳмон барои тоҷикистониён зарур хонд, ки бояд боз ҳам бештар заҳмат кашанд.
Вай муҳим донист, ки замину об самараноку оқилона истифода бурда шаванду, ҳарчи бештар маҳсулот истеҳсол гардид. Ин барои амалисозии ҳадафи стратегии миллӣ – ҳифзи амнияти озуқавории кишвар зарур дониста шуд.