ДУШАНБЕ, 12 ноя – Sputnik. Вазорати молияи Тоҷикистон бо мақсади хизматрасонии саривақтии қарзи берунаи ҷумҳурӣ беш аз 212 млн доллари амрикоиро пардохт кардаст.
Дар ин бора вазири молияи Тоҷикистон, Файзиддин Қаҳҳорзода зимни як ҷаласа дар парлумон иттилоъ дод.
Вай аз ҷумла изҳор дошт, ки барои пардохти қарзи асосӣ 139 млн доллари амрикоӣ ва фоизи қарзи хориҷӣ зиёда аз 73 млн долллар равона гардидаст.
Таъкид шуд, ки уҳдадориҳои давлат аз рӯи қарзҳои хориҷии ҷумҳурӣ тайи нуҳмоҳа саривақт иҷро карда шудаанд
Дар мавриди уҳдадориҳо аз рӯи қарзи дохилии давлатӣ, аз ҷумла аз рӯи коғазҳои қиматноки давлатӣ, векселҳои хазинадорӣ ва қарзи ҷалбгардидаи давлатӣ иттилоъ дода шуд, ки дар 9 моҳи аввали соли равон қариби 604 млн сомонӣ пардохт карда шуд.
Аз ин маблағи қарзи асосӣ 568 млн. сомонӣ ва фоизи қарз наздики 37 млн сомониро ташкил медиҳад.
Вазири молияи Тоҷикистон ахиран изҳор дошта буд, ки ҳаҷми қарзи хориҷии кишвар дар баробари ММД дар доираи эътидол буда, хавфе надорад.