ДУШАНБЕ, 8 ноя — Sputnik. Вазъи навори Ғазза ва Афғонистон аз мавзуъҳои музокироти раисҷумҳури Тоҷикистон, Эмомалӣ Раҳмон бо ҳамтояш аз Ҷумҳурии Исломии Эрон, Иброҳим Раисӣ будаанд.
Дар ин бора Эмомалӣ Раҳмон баъди анҷоми музокирот бо Раисӣ зимни нишасти матбуотӣ иттилоъ дод.
"Дар ҷараёни музокирот ҳамзамон атрофи масъалаҳои мубрами байналмилалӣ ва минтақавӣ, бахусус вазъи Афғонистон, қазияи Фаластин ва мушкилоти дигар минтақаҳои даргири ҷаҳон табодули афкор сурат гирифт", - гуфт Раҳмон.
Вай зикр намуд, ки Тоҷикистон оқибатҳои даҳшатбори ҷангу хунрезиро дидааст.
"Тоҷикистон чун кишваре, ки ҷанги шаҳрвандиро паси сар кардааст, ҷонибдории худро аз ҳалли мусолиматомези мушкилоту низоъҳо бо роҳҳои дипломатӣ ва гуфтушунидҳо изҳор медорад", - таъкид намуд Раҳмон.
Ӯ аз сатҳи хуби ҳамкорӣ бо Эрон дар чаҳорчӯби созмонҳои байналмилалӣ ва минтақавӣ, бахусус Созмони Милали Муттаҳид ва ниҳодҳои он, Созмони ҳамкории Шанхай, Созмони ҳамкории иқтисодӣ, Созмони ҳамкории исломӣ ва дигар сохторҳои бисёрҷониба изҳори қаноатмандӣ кардаст.
Мо алоқаманди идомаи густариши минбаъдаи ҳамкориҳои бисёрҷонибаи ду кишвар ҳастем, таъкид кардаст Раҳмон.
Президенти Тоҷикистон изҳори боварӣ намудаст, ки натиҷаҳои сафари президенти Эрон ба раванди рушди муносибатҳо ба нафъи мардумони ду кишвари дӯст такони тоза хоҳанд бахшид.