ДУШАНБЕ, 26 окт — Sputnik. Дар ҷаласаи Шӯрои сарони ҳукуматҳои кишварҳои узви Созмони ҳамкориҳои Шанхай 14 санад ба имзо расид.
Дар ин бора нахуствазири Қирғизистон Оқилбек Жапаров ба хабарнигорон дар поёни нишаст хабар дод.
"Муҳимтарин ҳуҷҷат ин баёнияи муштарак аст, ки мавқеъи ҷонибҳоро оид ба ҳамкориҳои гуногунҷанба инъикос мекунад", - қайд кард ӯ.
Илова бар ин, нахуствазири Қирғизистон гуфт, ки намояндагони кишварҳои узви ин созмон дар ин ҳамоиш дар мавриди фаъолияти ниҳодҳои СҲШ як қатор қарорҳо қабул кардаанд.
Ёдовар мешавем, ки дар Бишкек ҷаласаи 22-юми Шӯрои сарони ҳукуматҳои кишварҳои узви СҲШ баргузор шуд.
Дар чорабинӣ намояндагони ҳамаи 9 кишвари созмон, аз ҷумла Русия, Тоҷикистон, Ӯзбекистон, Қазоқистон ва Покистон ширкат доранд.
Илова бар ин, дар Бишкек ҷаласаҳои Шӯрои байниҳукуматии Авруосиё ва Шӯрои сарони ҳукуматҳои ИДМ баргузор мешаванд.