ДУШАНБЕ, 15 окт— Sputnik. Мақомоти вилояти Хатлон аз афзоиши истеҳсоли моҳи дар нӯҳ моҳи соли равон хабар доданд.
Ба иттилои ҳукумати вилояти давоми 9 моҳи соли ҷорӣ беш аз 1835 тонна моҳӣ истеҳсол карда шудааст, ки ин нисбати ҳамин давраи соли гузашта беш аз 301 тонна зиёд мебошад.
Ҳамчунин ҳукумати вилояти Хатлон хабар додааст, ки дар доираи имтиёзҳои пешниҳоднамудаи ҳукумати кишвар ба соҳаи моҳипарварӣ диққати махсус зоҳир карда шуда, шумораи хоҷагиҳои моҳипарварӣ ба 315 адад расид, ки нисбат ба ҳамин давраи соли гузашта 39 адад зиёд мебошад.
“Ба ин хоҷагиҳо ба масоҳати умумии 2339,5 гектар кӯлу ҳавзҳо вобаста гардида, боиси истеҳсоли зиёди моҳи гардидааст. Ба ҳолати 1 октябри соли равон ба миқдори беш 1835 тонна моҳӣ истеҳсол шуд”, - таъкид кардааст манбаъ.
Қайд гардид, ки айни ҳол дар хоҷагиҳои моҳипарварӣ 2 миллиону 724 ҳазор дона моҳича парвариш мешаванд, ки нисбати ҳамин давраи соли гузашта 562 ҳазор донна зиёд буда, ҷиҳати зиёд намудани истеҳсоли моҳӣ мусоидат менамояд.