ДУШАНБЕ, 13 окт— Sputnik. Дар ҳошияи ҷаласаҳои мазкур раиси Бонки миллии Тоҷикистон Ҳоким Холиқзода ва вазири молияи кишвар Файзиддин Қаҳҳорзода бо намояндагони Хазинаи Байналмилалии Асъор ва Бонки Ҷаҳонӣ дидору мулоқот кард.
Дар ин бора Хадамоти матбуоти Бонки миллии Тоҷикистон хабар додааст.
Бонки миллӣ қайд кардааст, ки ҷонибҳо зимни суҳбатҳои ҷолиб ва судманд вазъи иқтисодии кишварро баррасӣ намуданд.
Аз ҷумла тарафҳо масъалаҳои сармоягузорӣ, бахусус ҷараёни татбиқи лоиҳаҳои давлатии сармоягузорӣ дар соҳаи энергетика ва дигар соҳаҳои воқеии иқтисодиёт андешаҳои худро баён ва оид ба рушду тақвияти бештари ҳамкорӣ дар дигар соҳаҳои мавриди назар изҳори ҳавасмандӣ намуданд.
“Ҳамзамон, дар ҷараёни вохӯриҳо тарафҳо ислоҳотҳои калидии Ҳукумати Тоҷикистонро, ки аз ҷониби ташкилотҳои байналмилалии молиявӣ пешниҳод мешаванд, мавриди баррасӣ қарор доданд”, - қайд кардааст дафтари матбуоти Бонки миллӣ.
Бонки миллӣ ёдовар шудааст, ки бо мақсади иштирок дар ҷаласаҳои солонаи Хазинаи Байналмилалии Асъор ва Гурӯҳи Бонки Ҷаҳонӣ, ки 9 октябр оғоз ёфта, то 15 октябри соли 2023 идома меёбанд, раиси Бонки миллии Тоҷикистон Холиқзода Ҳоким Ҳикматулло ва вазири молияи кишвар Қаҳҳорзода Файзиддин Саттор ба шаҳри Марокаши Шоҳигарии Марокаш сафар намуданд.