ДУШАНБЕ, 13 окт— Sputnik. Масоили марзӣ аз мавзуъҳои меҳварии мулоқоти раҳбарони Тоҷикистону Қирғизистон, Эмомалӣ Раҳмон ва Содир Ҷабборов дар Бишкек будаст.
Дар ин бора дафтари матбуоти президенти Қирғизистон иттилоъ дода, афзуд, ки мулоқоти Раҳмон бо Ҷабборов дар ҳошияи ҷаласаи сарони кишварҳои узви ИДМ сурат гирифт.
"Роҳбарони кишварҳо масъалаҳои кунунии ҳамкориҳои дуҷонибаи Қирғизистону Тоҷикистон, доираи васеи мавзӯъҳо, аз ҷумла масъалаҳои делимитатсия ва демаркатсияи сарҳади давлатии ду кишварро баррасӣ карданд", - гуфт манбаъ.
Сарони давлатҳо аҳамияти идомаи муколамаи мунтазами сиёсиро ҷиҳати таҳкими ҳамсоягии неки ду кишвар ва халқҳо таъкид намудаанд.
Эмомалӣ Раҳмон ва Содир Ҷабборов омодагии худро барои сӯҳбати ошкоро ва ҳамаҷониба дар тамоми самтҳои ҳамкориҳои дуҷониба изҳор намуданд, гуфт дафтари матбуоти президенти Қирғизистон.
Сарҳади Қирғизистону Тоҷикистон аз масоили баҳсбарангези миёни ду кишвар мебошад, ки мунтазам сабаби даргириҳои ҷиддӣ миёни сокинони маҳаллӣ ва марзбонони ҷонибҳо мешавад.
Феълан гурӯҳҳои кории ду кишвар корҳоро дар таъйини марзҳо идома дода, мулоқотҳо бо навбат дар қаламрави Тоҷикистон ва Қирғизистон баргузор мешаванд.