ДУШАНБЕ, 12 окт — Sputnik. Дастаи футзали Тоҷикистон ба даври ниҳоии Ҷоми Осиё-2024 роҳ ёфт. Дар ин бора Федератсияи футболи ҷумҳурӣ хабар дод.
Гуфта мешавад, ки бо роҳбарии Пайрав Воҳидов даста дар мусобиқаи интихобӣ мақоми аввалро касб кард.
"Дар даври ниҳоии марҳилаи интихобии Ҷоми Осиё-2024 мунтахаби Тоҷикистон бар тими Мянмар бо ҳисоби 3:0 пирӯз шуд", - хабар медиҳад ФФТ.
Голҳоро Файзалӣ Сардоров, Идрис Ёров ва Комрон Алиев ба самар расониданд. Таъкид мешавад, ки футзалбозони тими миллӣ дар ҳар се бозии даври интихобӣ пирӯз шуданд.
Пештар футзали Тоҷикистон бар тимҳои Ҳиндустон (6:3) ва Фаластин (6:1) пирӯз шуда буд.
Ёдовар мешавем, ки футзалбозони Тоҷикистон бори дувоздаҳум дар Ҷоми Осиё ширкат мекунанд.