ДУШАНБЕ, 6 окт — Sputnik. Дастаҳои "Равшан"-и Тоҷикистон ва "Олтин Асир"-и Туркманистон бозияшонро мусовӣ анҷом доданд.
Дар ин бора Федератсияи футболи Тоҷикистон иттилоъ дода, афзуд, ки зӯрозмоии ду тим бо ҳисоби 1:1 анҷом ёфт. Бозӣ дар шаҳри Ишқобод баргузор шуд.
Ҳамин тариқ, легионери танзаниягии тими "Равшан"-и Кӯлоб, Эммануэл Мваненго нахустин голро дар дақиқаи 17-ум вориди дарвозаи тими мизбон кард.
Аммо тими Тоҷикистон пешсафиро то охир нигоҳ доштан натавонист. Дар дақиқаи 52-юми даври дуюми бозӣ, футболбози "Олтин Асир", Раҳмон Муратбердиев ҳисобро баробар кард.
Дар зӯрозмоӣ беҳтарин бозигар, футболбози "Равшан" Евгений Гритсенко дониста шуд.
Бозии "Равшан" ва "Олтин Асир" дар Ишқобод ва дар доираи бозиҳои марҳилаи гурӯҳии Лигаи қаҳрамонҳои AFC-2023/24 дар дар гуруҳи Е баргузор шуд.
Интизор меравад, дар даври сеюми марҳилаи гурӯҳии Лигаи қаҳрамонҳои Осиё-2023/24 "Равшан" бо бошгоҳи қаҳрамони Қирғизистон "Абдиш-Ата" бозӣ кунад. Ин бозӣ 26 октябр дар Варзишгоҳи марказии Ҳисор ба нақша гирифта шудааст.