ДУШАНБЕ, 18 сен — Sputnik. Дар маросими ифтитоҳи маҷмааи хизматрасонии "Анситу", раиси вилояти Суғд Раҷаббой Аҳмадзода ва раиси шаҳри Хуҷанд Фирдавс Шарифзода иштирок доштанд.
Дар ин бора дафтари матбуоти ҳукумати Суғд иттилоъ дода, афзуд, ки маҷмаа бо оростани дастархони идона барои беш аз 80 нафар наврасони ятиму бепарастор фаъолияташро оғоз бахшида, ҳамчунин ба онҳо туҳфаҳои хотиравӣ тақдим кардаст.
"Маҷмаа аз ду ошёна ва таҳхона иборат буда, дар як вақт ба зиёда аз 300 нафар хизмат расонида мешавад. Дар ин маҷмаа беш аз 50 нафар сокинон бо ҷойи кори доимӣ таъмин карда шуданд", - омадааст дар иттилоия.
Аҳмадзода дар ифтитоҳи маҷмааи мазкур изҳор дошт, ки ба истиқболи 35 - солагии Истиқлоли давлатии Тоҷикистон дар шаҳру навоҳии вилоят бунёду азнавсозии ҳазорҳо иншооти таъиноташ гуногун бомаром идома дорад.
Ба иттилои мақомот, дар шаҳру ноҳияҳои вилояти Суғд, сохтмон, азнавбарқароркунӣ ва таъмиру тармими 12 ҳазор иншоот ба нақша гирифт шуда буд, ки чоряки он иҷро гардид.
Мақомоти Суғд мегӯянд, дар соли 2022 ва нимсолаи аввали 2023 сохтмон, азнавбарқароркунӣ ва таъмиру тармими беш аз 3,1 ҳазор иншоот ба анҷом расонда шуд.