ДУШАНБЕ, 15 сен - Sputnik. Аз моҳи январи соли 2024 ба муддати се сол Раёсат дар Фонди байналмилалии наҷоти Арал аз Тоҷикистон ба Қазоқистон мегузарад.
Дар ин хусус раиси Кумитаи иҷроияи Фонди байналмилалии наҷоти Арал Султон Раҳимзода дар брифинге, ки дар Душанбе доир шуд, хабар дод.
Ёдовар мешавем, ки дар шаҳри Душанбе ҷаласаи ҷашнии Шурои сарони давлатҳои муассиси Фонди байналмилалии наҷоти Арал, таҳти Раёсати президенти Тоҷикистон бо иштироки Сарони давлатҳои муассиси фонд баргузор гардид.
Дар ин ҷаласа маҷмуи масъалаҳои муҳими марбут ба фаъолияти Фонд, хусусан натиҷаҳои раисии Тоҷикистон, такмили сохтори ташкилӣ ва заминаи созишномавӣ ва ҳуқуқии фонди наҷоти Арал баррасӣ гардида, самтҳои ояндадори фаъолияти муштарак зимни андешидани тадбир дар ин бахшҳо муайян шуданд.
Фонди байналмилалии наҷоти Арал соли 1993 бо ташаббуси давлатҳои Осиёи Марказӣ бо мақсади бартарафсозии буҳрони экологӣ ва беҳдошти вазъи иҷтимоию иқтисодӣ дар ҳавзаи баҳри Арал таъсис дода шудааст.