Сабукӣ барои рушди қолинбофӣ дар ИИАО

Шӯрои Комиссияи иқтисодии АвруОсиё қарор кардааст, ки аз тариқи додани имтиёзоти молиётӣ рушди қолинбофиро дар қаламрави кишварҳои созмон такон бахшад
Sputnik
ДУШАНБЕ, 30 авг — Sputnik. Боҷи гумрукии воридотии бархе аз анвои мол ба қаламрави Иттиҳоди иқтисодии АвруОсиё лағв шудааст.
Ба иттилои Комиссияи иқтисодии АвруОсиё, аз ҷумла, молу маҳсулоте бидуни пардохти боҷи гумрукӣ ворид мешаванд, ки дар қолинбофӣ истифода мегарданд. Дар феҳраст аз матоъҳое ном бурда шудааст, ки аз риштаи нафис ва полиэтиленӣ ё полипропилен таҳия шудаанд.
Муҳлати амали муқаррароти ҷадид, ки 10 рӯз пас аз нашри расмӣ мавриди амал қарор мегирад, 2 сол муайян шудааст.
Маврид ба зикр аст, ки то ҳол воридоткунандагони матоъ ва дигар колои зарурӣ ба қолинбофӣ боҷи гумрукиро дар ҳаҷми 8% пардохт мекарданд.
Содироти Қолинҳои Тоҷикистон ба Русия ва Ӯзбекистон
Комиссияи иқтисодии АвруОсиё таъкид мекунад, ки қарори мазкур барои дастгирии тавлидкунандаҳои қолин дар кишварҳои узви созмон равона гардидааст.
Интизор меравад, ки арзиши аслии қолинҳои тавлиди дохилӣ поин рафта, даромаднокию рақобатнокии қолинҳо болотар меравад.
Дар назар аст, ки дар пайи ироаи сабукӣ қолинбофӣ дар Иттиҳоди иқтисодии АвруОсиё рушд кунад, ки на танҳо талаботи дохилиро қонеъ мегардонад, балки ба содирот низ равона хоҳад шуд.
Комиссия муътақид аст, ки ин тасмим барои коҳиши фишори таҳримҳо ба иқтистоди кишварҳои узви Иттиҳоди АвруОсиё мусоидат мекунад.