ДУШАНБЕ, 23 авг — Sputnik. Муовини раиси Шӯрои амнияти Русия Дмитрий Медведев, ахиран гуфт, ки НАТО алайҳи Русия ҷанги комил ва хунин мебарад ва таъкид кард, ки "душман пурра дар ин масъала ғарқ шудааст."
“Ҷанги "ниёбатӣ", вале комилан пурқудрат ва хунине, ки ҳоло НАТО бо мо дар Украина бо дасти режими Киев мебарад ва мухолифони мо дар он то пурра ғарқ шудаанд, онро метавон бо тамоми возеҳот тасдиқ кард. Ҳама чиз чӣ гуна анҷом меёбад, ҳоло рӯшан аст: шикасти нангини Киев, мисли қаблан – таҷовузкорони гурҷӣ”, - навиштааст оқои Медведев дар мақолае дар бораи ҳаводиси соли 2008 барои рӯзномаи “Аргументы и факты”.
Вай пешгӯӣ кард, ки дар оянда Украина аз харитаи сиёсии ҷаҳон бардошта мешавад.
Ҳамчунин, ба гуфтаи вай "актёрҳои сиёсии беистеъдод" ба таври нангин аз саҳнаи сиёсӣ берун мешаванд.
Ёдовар мешавем, ки шаби 8-уми августи соли 2008 Гурҷистон аз чанд мушакандози "Град" Осетияи Ҷанубиро гулулаборон кард. Нерӯҳои гурҷӣ ба ин ҷумҳурӣ ҳамла карданд ва бахше аз пойтахти он шаҳри Тсхинвалро тахриб карданд.
Русия аз сокинони Осетияи ҷанубӣ, ки аксари онҳо шаҳрвандии Русияро гирифта буданд, ҳимоят кард ва ба ин ҷумҳурӣ сарбозонашро фиристод ва пас аз панҷ рӯзи даргириҳо артиши Гурҷистонро аз минтақа берун кард.
26 августи соли 2008 Маскав соҳибихтиёрии Абхозистон ва Осетияи Ҷанубиро ба расмият шинохт.
Раҳбарияти Русия борҳо изҳор доштааст, ки эътирофи истиқлоли ду минтақаи мухтори собиқи Гурҷистон инъикосгари воқеияти мавҷуд аст ва мавриди бозбинӣ нест. Гурҷистон то ҳол Абхозистон ва Осетияи Ҷанубиро ба ҳайси кишварҳои мустақил эътироф намекунад ва онҳоро минтақаҳои худ медонад.