ДУШАНБЕ, 21 авг — Sputnik. Мактаббачагон аз Тоҷикистон бо пойтахти кайҳонии Русия шинос мешаванд, иттилоъ дод "Россотрудничество".
Ба иттилои манбаъ, муҳассилин аз шаҳрҳои Душанбеву Турсунзода феълан дар Самара қарор доранд. Ин боздид дар доираи барномаи "Салом, Русия!" имкони сафар пайдо карданд.
"Дар ин сафар дар маҷмӯъ беш аз 50 нафар кӯдак аз кишварҳои ИДМ, Австрия, Юнон, Португалия ва Лаҳистон иштирок мекунанд", - таъкид мекунад манбаъ.
Аввалан, бачаҳо ҷойҳои тамошобоби Маскавро диданд ва аллакай дар рӯзҳои истироҳат ба Самара омаданд.
Дар ин ҷо наврасони тоҷикро барномаи ғании фарҳангиву маърифатӣ интизор аст, ки боздид аз осорхонаҳо ва боғҳои таърихӣ, дарсҳои маҳорат, флешмобҳоро фаро мегиранд.
Илова бар ин, муҳассилин бо ҳамдигар муоширати фаъол карда, дар баробари муаррифии кишварҳои худ, бо фарҳанг ва таърихи Русия шинос хоҳанд шуд.
Қаблан шаш нафар мактаббачагони шаҳри Душанбе ба лагери байналмилалии кӯдаконаи таълимӣ ва солимгардонии "Артек" роҳхатҳо гирифтанд.
Мудири Маркази кӯдакону наврасони шаҳри Душанбе Комилҷон Холов изҳор дошта буд, ки муҳассилин дар озмуни байналмиллалӣ аз рӯи барномаи Иттиҳоди ҷавонон ғолиб омада буданд.
Ба барномаи фароғатии лагери кӯдакона мактаббачагон аз 50 кишвари ҷаҳон, аз ҷумла - Қазоқистон, Ӯзбекистон, Беларус, Сурия, Миср ва дигар кишварҳо ҷалб гардида буданд.