ДУШАНБЕ, 16 авг — Sputnik. Аз ҳисоби сангҳои гаронбаҳо ва ороишии ноҳияи Роштқалъа метавон ҳаҷми тавлиду содироти маҳсулоти саноатии ноҳияро зиёд кард.
Ин нуктаро президенти Тоҷикистон, Эмомалӣ Раҳмон дар мулоқот сокинони Роштқалъа баён дошта, аз вазъи феълии саноат дар ноҳия изҳори норозигӣ намуд.
"Ҳаҷми умумии маҷмӯи маҳсулоти саноатии ноҳия тайи ду даҳсолаи охир ҳамагӣ 35%, яъне аз 2,6 млн сомонии соли 2000-ум то 3,5 млн сомонӣ дар соли 2022 афзоиш ёфтааст", - гуфт ӯ.
Раҳмон таъкид намуд, ки нишондиҳандаи зикршуда, бо дарназардошти имкониятҳои мавҷудаи ноҳия қонеъкунанда нест ва ба талаботи ҳадафи стратегии миллӣ – саноатикунонии босуръати кишвар ҷавобгӯ намебошад.
Вай барои ислоҳи вазъ ба масъулин супориш дода, зикр намуд, ки дар ҳудуди ноҳия конҳои гуногуни канданиҳои фоиданок, аз ҷумла - сангҳои қиматбаҳову ороишӣ мавҷуданд.
"Аз ҷумла лоҷвард, рубин, гранат, квартс, аквамарин, турмалин, мармар ва монанди инҳо мавҷуданд, ки истихроҷ ва коркарди онҳо ба зиёд гардидани ҳаҷми истеҳсолу содироти маҳсулоти саноатӣ ва ташкили ҷойҳои кории нав мусоидат менамояд", - гуфт президент.
Раисҷумҳур роҳбарияти вилояту ноҳияро якҷо бо Вазорати саноат ва технологияҳои нав ва Кумитаи давлатии сармоягузорӣ ва идораи амволи давлатӣ муваззаф кард, ки барои таъсис додани корхонаву коргоҳҳои нави саноатӣ бо ҷалби сармояи дохиливу хориҷӣ чораҷӯӣ намоянд.