ДУШАНБЕ, 13 авг — Sputnik. Бо супориши бевоситаи вазири тандурустӣ ва ҳифзи иҷтимоии аҳолии Тоҷикистон гурӯҳи корӣ иборат аз мутахассисони соҳаи равонпизишкӣ, равоншифоӣ ва равоншиносии сатҳи ҷумҳуриявӣ ташкил ва ба шаҳри Кӯлоб сафарбар карда шуд, иттилоъ додааст дафтари матбуоти вазорати тандурустӣ.
Ба иттилои манбаъ, аз ҷониби мутахассисон ҳар як бемор ва осебдида ҷудогона аз муоинаи равонӣ гузаронида шуда, ҳолати баъдисадамавии онҳо муайян гардид.
Ҳамчунин қайд карда шудааст, ки табиби равонпизишки минтақа саривақт дорую дармонҳои лозимаро барои беморон ва осебдидагон таъйин намуда, ҳолати равонии онҳоро зери назорат гирифтааст.
Мутахассисони гурӯҳи корӣ бо мақсади суст гардонидани омили садама дар шуури беморони осебдида сӯҳбатҳои равонӣ гузаронида, барои табибони минтақа тавсияҳои табобатӣ-профилактикӣ пешниҳод намуданд.
“Нисбати ҳар як бемор бо табибони минтақа маслиҳат намуда, тавсияҳои табобатӣ - профилактикӣ дода шуд”, - зкир кардааст вазорати тандурустӣ.
Ҳамчунин, мутахассисони соҳа бо наздикону пайвандони фавтидагони садамаи нақлиётии мазкур низ сӯҳбат гузаронида ба онҳо кӯмаки равонӣ расониданд.
Ёдовар мешавем, ки ахиран дар зимни баргузории нишасти матбуотӣ аз ҷониби рӯзноманигорон пешниҳод шуда буд, ки ба осебидагони садамаи нақлиётии шаҳри Кӯлоб ва наздикону пайвандони фавтидагон кӯмаки равонӣ расонида шавад, чун онҳо дар ҳолати душвор қарор доранд.