ДУШАНБЕ, 8 авг — Sputnik. Бино бар иттилои дафтари матбуоти Бонки миллии Тоҷикистон дар давраи ҳисоботӣ сатҳи таваррум 2,3%-ро ташкил намуд, ки нисбат ба ҳамин давраи соли гузашта 1,8 банди фоизӣ кам мебошад.
Бонки миллӣ қайд кардааст, ки нишондиҳандаи мазкур асосан аз ҳисоби болоравии нархи маҳсулоти хӯрокворӣ 3%, молҳои ғайрихӯрокворӣ 2,9% ба амал омада, хизматрасониҳои пулӣ ба аҳолӣ 0,4 фоиз раванди коҳишёбӣ дошт.
Ҳамчунин БМТ иттилоъ додааст, ки меъёри бозтамвил, ки ҳамчун фишанги калидии сиёсати пулию қарзӣ барои анҷом додани амалиётҳои монетарӣ ба ҳисоб меравад аз аввали соли 2023 тадриҷан ба андозаи 3 банди фоизӣ паст карда шуда, дар сатҳи 10% солона муқаррар гардид.
Дар ҳамин ҳол, раҳбарияти БМТ зикр кардааст, ки дар нимсолаи якуми соли равон фаъолияти худро барои татбиқи самараноки сиёсати пулию қарзӣ, рушди ҳисоббаробаркунии ғайринақдӣ ва дигар воситаҳои молиявӣ идома додаааст.
Бонки миллӣ таъкид доштааст, ки барои таъмини муътадилии сатҳи нархҳои дохилӣ ва устувории қурби пули миллӣ, нигоҳ доштани қобилияти пардохтпазирии ташкилотҳои қарзӣ ва баланд бардоштани эътимоди аҳолӣ ба низоми бонкӣ, инчунин таъмини фаъолияти босуботу бехатари низоми пардохт чораҳои зарурӣ меандешад.