ДУШАНБЕ, 5 авг — Sputnik. Консули генералии Тоҷикистон дар шаҳри Екатеринбург Зафар Сайидзода ҳамватани қаҳрамонашро бо Ифтихорнома қадр кард.
Дар ин бора, Шӯрои ҷамъиятии назди сафорати Тоҷикистон дар Русия хабар медиҳад.
Дипломати тоҷик бо ҳамватани ҷасуру шуҷои худ, ки 1 август аз ошёнаи 25--и манзили маҳаллаи "Светлий"-и шаҳри Екатеринбург як занро бо кӯдакаш аз оташ наҷот дод, суҳбати самимии хотирмон кард.
Сайидзода ба муҳоҷири тоҷик барои шуҷоатмандияш арзи сипос кардааст.
Тавре расонаҳои Русия аз қавли Манучеҳр Расулов навишта буданд, ӯ дар аввал гумон бурдааст, ки зан аз ақл берун шудаву тасмими аз он баландӣ ба поён париданро дорад.
Манучеҳр аз девор ҳавлӣ ҷаҳида, ба сӯи бинои баландошёна давида, дод задааст: "Ин корро накунед! Худро ба даст гиред!" Пас бо зинапояҳо ба дари ҳуҷраи оташгирифта мерасад. Бидуни мисрон (лом) ва асбоби дигар, танҳо бо ёрии оҳанпораҳо дари ҳуҷраро кушода, аввал кӯдак, сипас модарашро ба даҳлез баровардааст.
Ҳамин тавр, ба шарофати қаҳрамонии ин муҳоҷири ҷавони тоҷик зану кӯдак рус аз ошёнаи 25 аз сӯхтор раҳо ёфтаанд.
Таъкид шудааст, ки Манучеҳр Расулов барои ин корнамоиаш аз тарафи ширкати сохтмонӣ, ки дар он кор мекард, бо ифтихорнома ва мукофотпулӣ қадрдонӣ шудааст.