ДУШАНБЕ, 26 июл — Sputnik. Ҳамкориҳои фарҳангии Тоҷикистону Русия таҳким ёфта, миёни ду кишвар ҳеч мушкиле дар ин самт ҷой надорад.
Ин нуктаро вазири фарҳанги Тоҷикистон, Зулфия Давлатзода зимни нишасти матбуотӣ баён дошт.
Вай изҳори боварӣ намуд, ки ҳамкориҳои фарҳангии ду кишвар минбаъд низ рушд хоҳанд кард. Ӯ зикр намуд, ки ҳунармандон аз Русия ба театрҳои тоҷик ҷалб шуда истодаанд ва мисол овард, ки айни ҳол дар Театри опера ва балет низ фаъолият доранд.
Давлатзода инчунин аз Рӯзҳои фарҳанги Русия дар Тоҷикистон ёдовар шуда, афзуд, ки санъаткорони касбии ин кишвар ҳам дар Душанбе ва ҳам дар шаҳри Хуҷанд хеле хуб пазируфта шуданд.
Дар мавриди сафарҳои хориҷии ҳунармандони тоҷик зикр намуд, ки дар нимсола ҳайати эҷодии Театри давлатии драмавии русии ба номи Владимир Маяковский дар 25-умин Фестивали байналмилалии театрҳои русӣ "Встречи в Росии" дар шаҳри Санкт-Петербург иштирок карданд.
Вазири фарҳанг дар мавриди бинои Театри давлатии драмавии русии ба номи Владимир Маяковский изҳор дошт, ки ҷойи он аллакай муайян шудаасту интизор меравад, дар ҳамкорӣ бо як ширкати русиягӣ бунёди он низ рӯзҳои наздик оғоз гардад.
Бинои қаблии театри Маяковскйи дар Душанбе соли 2016 тахриб шуда буд, ки мақомот сабаби онро ба талаботти театри муосир ҷавобгӯ набудани бино хонданд.